ಕಾಳಧನಿಕರಿಗೆ ಸಂಕಷ್ಟ ನಿಶ್ಚಿತ

ಕಾಳಧನಿಕರಿಗೆ ಸಂಕಷ್ಟ ನಿಶ್ಚಿತ

ಹೊಸದಿಲ್ಲಿ: ಘೋಷಿತ ಕಾಳಧನಕ್ಕೆ ಶೇ.50ರಷ್ಟು, ಅಘೋಷಿತ ಕಾಳಧನಕ್ಕೆ ಶೇ.85ರಷ್ಟು ತೆರಿಗೆ ವಿಧಿಸುವುದಕ್ಕೆ ಅವಕಾಶ ಕಲ್ಪಿಸುವ ವರಮಾನ ತೆರಿಗೆ ತಿದ್ದುಪಡಿ ವಿಧೇಯಕವನ್ನು ಲೋಕಸಭೆ ಮಂಗಳವಾರ ಧ್ವನಿಮತದಿಂದ ಅಂಗೀಕರಿಸಿದೆ. ನೂತನ ವಿಧೇಯಕ ಮನಿಬಿಲ್‌ ರೂಪದಲ್ಲಿ ಮಂಡನೆಯಾಗಿರುವುದರಿಂದ ಇದು ಕಾನೂನಾಗಿ ಜಾರಿಗೆ ಬರಲು ಲೋಕಸಭೆಯ ಅನುಮತಿಯಷ್ಟೇ ಸಾಕು. ಆಡಳಿತಾರೂಢ ಎನ್‌ಡಿಎ ಅಲ್ಪಮತ ಹೊಂದಿರುವ ರಾಜ್ಯಸಭೆಯಲ್ಲಿ ಹಣಕಾಸು ವಿಧೇಯಕವನ್ನು ಮಂಡಿಸಬೇಕಾದ ಅಗತ್ಯವೇನೂ ಇರುವುದಿಲ್ಲ. ಸತತ ಎಂಟನೇ ದಿನದ ಕಲಾಪವೂ ನೋಟು ರದ್ದು ವಿವಾದಕ್ಕೆ ಬಲಿಯಾಯಿತು. ರಾಜ್ಯಸಭೆಯಲ್ಲಿ ಮಂಗಳವಾರ ಯಾವುದೇ ಕಲಾಪ ಸಾಧ್ಯವಾಗಲಿಲ್ಲ. ಲೋಕಸಭೆಯಲ್ಲೂ ತೀವ್ರ ಗದ್ದಲ ವಾತಾವರಣವಿತ್ತು. ನೋಟು ರದ್ದು ವಿಷಯವನ್ನು ಮತದಾನಕ್ಕೆ ಅವಕಾಶವಿರುವ ನಿಲುವಳಿ ಸೂಚನೆಯಡಿ ಚರ್ಚೆಗೆತ್ತಿಕೊಳ್ಳಬೇಕು ಮತ್ತು ಚರ್ಚೆಯುದ್ದಕ್ಕೂ ಪ್ರಧಾನಿ ಮೋದಿ ಅವರು ಸದನದಲ್ಲಿ ಉಪಸ್ಥಿತರಿರಬೇಕು ಎಂಬ ಷರತ್ತಿನೊಂದಿಗೆ ಪ್ರತಿಪಕ್ಷ ಸದಸ್ಯರು ಗದ್ದಲ ನಡೆಸಿದ್ದರು. ಸದನ ಘೋಷಣೆ, ಮಾತಿನ ಸಮರದಲ್ಲಿ ಮುಳುಗಿಹೋಗಿತ್ತು. ಗದ್ದಲದ ನಡುವೆಯೇ ಅಂಗೀಕಾರ ಇಂತಹ ಗದ್ದಲದ ನಡುವೆಯೇ ಸೋಮವಾರ ಮಂಡನೆಯಾದ ವಿಧೇಯಕವನ್ನು ಸದನದ ಚರ್ಚೆಗೆ ಬಿಟ್ಟ ವಿತ್ತ ಸಚಿವ ಅರುಣ್‌ ಜೇಟ್ಲಿ, ವಿಧೇಯಕದ ಮೇಲೆ ಚರ್ಚೆ ನಡೆಸಿ, ಸದಸ್ಯರು ಅನುಮತಿ ನೀಡಬೇಕು ಎಂದು ಕೋರಿದರು. ವಿಧೇಯಕಕ್ಕೆ ಸದಸ್ಯರು ಕೆಲವು ತಿದ್ದುಪಡಿ ಕೋರಿದರಾದರೂ ಅದು ಸಾಧ್ಯವಾಗಲಿಲ್ಲ. ಆರ್‌ಎಸ್‌ಪಿ ಸದಸ್ಯ ಎನ್‌.ಕೆ. ಪ್ರೇಮಚಂದ್ರನ್‌ ಮತ್ತು ಬಿಜೆಡಿ ಸದಸ್ಯ ಬಿ, ಮಹತಾಬ್‌ ಮಂಡಿಸಿದ ತಿದ್ದುಪಡಿಗೆ ಸರಕಾರ ಅವಕಾಶ ನೀಡಿತಾದರೂ, ಮಹತಾಬ್‌ ಸರಕಾರದ ವಿರುದ್ಧ ಘೋಷಣೆ ಕೂಗುವುದಕ್ಕೇ ಮಹತ್ವ ನೀಡಿದ್ದರಿಂದ ಅದೂ ಸಾಧ್ಯವಾಗಲಿಲ್ಲ. ಚರ್ಚೆಗೆ ಪಟ್ಟು ಹಿಡಿದ ಖರ್ಗೆ:ವರಮಾನ ತೆರಿಗೆ ವಿಧೇಯಕದ ತರಾತುರಿ ಅಂಗೀಕಾರ ಬೇಡ. ನೋಟು ರದ್ದು ವಿಚಾರಕ್ಕೆ ಇದೂ ಸಂಬಂಧಪಟ್ಟಿರುವುದರಿಂದ ಎರಡೂ ವಿಷಯಗಳನ್ನೂ ಒಟ್ಟಿಗೆ ಚರ್ಚಿಸಿ ನಿರ್ಧಾರ ಕೈಗೊಳ್ಳೋಣ ಎಂದು ಲೋಕಸಭೆ ಕಾಂಗ್ರೆಸ್‌ ಸಂಸದೀಯ ಪಕ್ಷದ ನಾಯಕ ಮಲ್ಲಿಕಾರ್ಜುನ ಖರ್ಗೆ ಒತ್ತಾಯಿಸಿದರು. ಅಲ್ಲದೇ ನೋಟು ರದ್ದು ವಿಚಾರವಾಗಿ ಚರ್ಚೆಗೆ ಎರಡು ನಿಲುವಳಿ ಸೂಚನೆ ನೋಟಿಸ್‌ ಅನ್ನೂ ನೀಡಿದರು. ವಿಳಂಬದಿಂದ ಅನಾಹುತ: ಜೇಟ್ಲಿ: ಆದರೆ, ವರಮಾನ ತೆರಿಗೆ ವಿಧೇಯಕವನ್ನು ವಿಳಂಬ ಮಾಡುವಂತಿಲ್ಲ. ಈಗಾಗಲೇ ಕಾಳಧನಿಕರು ಹಣ ವಿನಿಮಯದ ಅವಕಾಶವನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿರುವ ವರದಿ ಇದೆ. ಇದನ್ನು ತಡೆಯಲು ಬಲಿಷ್ಠ ಕಾಯಿದೆ ಅಗತ್ಯವಿದೆ. ಈ ಬಗ್ಗೆ ಚರ್ಚಿಸುತ್ತಾ ಕುಳಿತುಕೊಳ್ಳಲಾಗದು. ಅದೂ ಅಲ್ಲದೇ, ಹೊಸ ಪ್ರಸ್ತಾಪದಿಂದ ಬರುವ ಆದಾಯವನ್ನು ಬಡವರ ಕಲ್ಯಾಣಕ್ಕೆ ಉಪಯೋಗಿಸಿಕೊಳ್ಳುವುದರಿಂದ ಈ ಬಗ್ಗೆ ಆತಂಕವೂ ಬೇಡ ಎಂದು ಜೇಟ್ಲಿ ವಾದಿಸಿದರು. ತಮ್ಮ ವಾದವನ್ನು ಒಪ್ಪಿಕೊಳ್ಳದ ಸರಕಾರದ ಕ್ರಮದಿಂದ ಸಿಟ್ಟಿಗೆದ್ದ ಪ್ರತಿಪಕ್ಷ ಸದಸ್ಯರು ಸ್ಪೀಕರ್‌ ಸುಮಿತ್ರಾ ಮಹಾಜನ್‌ ಆಸನದ ಮುಂಭಾಗದಲ್ಲಿ ಜಮಾಯಿಸಿ ಘೋಷಣೆ ಕೂಗಲಾರಂಭಿಸಿದರು. ಈ ಗದ್ದಲದ ಮಧ್ಯೆಯೇ ಸ್ಪೀಕರ್‌ ಅವರು ವಿಧೇಯಕವನ್ನು ಮತಕ್ಕೆ ಹಾಕಿದರು. ವಿಧೇಯಕ ಧ್ವನಿಮತದಿಂದ ಅಂಗೀಕಾರಗೊಂಡಿತು. ಕಲಾಪ ಮುಂದಕ್ಕೆ:ವಿಧೇಯಕಕ್ಕೆ ಒಪ್ಪಿಗೆ ದೊರೆಯುತ್ತಿದ್ದಂತೆ ಕಲಾಪ ಮುಂದುವರಿಸಲು ಸ್ಪೀಕರ್‌ ಪ್ರಯತ್ನ ನಡೆಸಿದರಾದರೂ, ಪ್ರತಿಪಕ್ಷ ಸದಸ್ಯರ ಗದ್ದಲ ಮುಂದುವರಿದ ಕಾರಣ ಕಲಾಪವನ್ನು ಬುಧವಾರಕ್ಕೆ ಮುಂದೂಡಿದರು