ಲೇಡಿಸ್‌ ಟಾಯ್ಲೆಟ್‌ ಪ್ರವೇಶ: ರಾಹುಲ್‌ ಗಾಂಧಿ ಎಡವಟ್ಟು!

ಲೇಡಿಸ್‌ ಟಾಯ್ಲೆಟ್‌ ಪ್ರವೇಶ: ರಾಹುಲ್‌ ಗಾಂಧಿ ಎಡವಟ್ಟು!

ವಡೋದರ: ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ ಅವರು ಗುಜರಾರ್‌ ಪ್ರವಾಸದ ವೇಳೆ ಆಕಸ್ಮಿಕವಾಗಿ ಮಹಿಳೆಯರ ಶೌಚಾಲಯ ಪ್ರವೇಶಿಸಿರುವುದು ಸಾಮಾಜಿಕ ಜಾಲ ತಾಣದಲ್ಲಿ ಭಾರಿ ಸುದ್ದಿಯಾಗಿದೆ!

ರಾಹುಲ್‌ ಅವರು ತಮ್ಮ ಮೂರು ದಿನಗಳ 'ನವಸರ್ಜನ್‌ ಯಾತ್ರೆ' ಭಾಗವಾಗಿ ಚೋಟೇ ಉದಯ್‌ಪುರದ ದರ್ಬಾರ್‌ ಹಾಲ್‌ನಲ್ಲಿ ನಡೆದ ಬುಡಕಟ್ಟು ವಿದ್ಯಾರ್ಥಿಗಳ ಜತೆ ಸಂವಾದ ನಡೆಸಿದ್ದರು. ಸಂವಾದ ಮುಗಿದ ಬಳಿಕ ಅವರು ಟಾಯ್ಲೆಟ್‌ ಕಡೆಗೆ ಹೋಗಿದ್ದರು. ಆದರೆ, ಅವರು ಹೊಕ್ಕಿದ್ದು ಮಾತ್ರ ಮಹಿಳೆಯರ ಶೌಚಾಲಯವನ್ನು.

ಟಾಯ್ಲೆಟ್‌ ಎದುರಿನಲ್ಲಿ ಗುಜರಾತಿ ಭಾಷೆಯಲ್ಲಿ 'ಮಹಿಳಾವೋ ಮಾಟೆ ಶೌಚಾಲಯ್‌' (ಮಹಿಳೆಯರ ಶೌಚಾಲಯ) ಎಂಬ ಬೋರ್ಡ್‌ ಇತ್ತು. ಅದರೆ, ರಾಹುಲ್‌ ಅವರಿಗಾಗಲೀ, ಅವರ ಜತೆಗಿದ್ದ ಅಂಗರಕ್ಷಕರಿಗಾಗಲೀ ಗುಜರಾತಿ ಭಾಷೆ ಬರದೆ ಈ ಗೊಂದಲ ಉಂಟಾಗಿತ್ತು.

ರಾಹುಲ್‌ ಗಾಂಧಿ ಅವರು ಟಾಯ್ಲೆಟ್‌ನಿಂದ ಹೊರಬರುತ್ತಿದ್ದಂತೆಯೇ ಮಾಧ್ಯಮದವರು ಸೇರಿದಂತೆ ನೂರಾರು ಮಂದಿ ಅಲ್ಲಿ ಜಮಾಯಿಸಿದ್ದರು. ರಾಹುಲ್‌ ಗಾಂಧಿ ಅವರಿಗೆ ಹೆಚ್ಚು ಮುಜುಗರವಾಗಬಾರದೆಂದು ಕೂಡಲೇ ಮಾಧ್ಯಮದವರನ್ನು ಮತ್ತು ಸ್ಥಳೀಯರನ್ನು ದೂರ ಕಳುಹಿಸಲಾಯಿತು.

ಕಾಂಗ್ರೆಸ್‌ ನಿರಾಕರಣೆ: ಈ ನಡುವೆ, ಕಾಂಗ್ರೆಸ್‌ ಇಂತಹುದೊಂದು ಘಟನೆ ನಡೆದೇ ಇಲ್ಲ. ಬಿಜೆಪಿ ರೂಪಿಸಿದ ಸಂಚು ಇದು ಎಂದು ಆರೋಪಿಸಿದೆ.

''ರಾಹುಲ್‌ ಗಾಂಧಿ ಅವರು ಮಹಿಳೆಯರ ಶೌಚಾಲಯದ ಪಕ್ಕದಲ್ಲಿ ಹಾದು ಹೋಗಿದ್ದು ಮಾತ್ರ. ಒಳಗೆ ಪ್ರವೇಶಿಸಿಲ್ಲ. ಇದನ್ನೇ ನಾವು ಚಿತ್ರದಲ್ಲಿ ಕಾಣವುದು. ಆದರೆ, ಕಾಂಗ್ರೆಸ್‌ ನಾಯಕನ ಗೌರವಕ್ಕೆ ಮಸಿ ಬಳಿಯಲು ಈ ರೀತಿ ಸುದ್ದಿ ಹಬ್ಬಿಸಲಾಗುತ್ತಿದೆ,'' ಎಂದು ಕಾಂಗ್ರೆಸ್‌ ವಕ್ತಾರ ಮನೀಷ್‌ ದೋಷಿ ಹೇಳಿದ್ದಾರೆ.

ರಾಹುಲ್‌ ಗಾಂಧಿ ಅವರ ಗುಜರಾತ್‌ ಯಾತ್ರೆ ಯಶಸ್ವಿಯಾಗಿದ್ದು, ಇದರಿಂದ ಜನರ ಗಮನವನ್ನು ಬೇರೆಡೆಗೆ ತಿರುಗಿಸಲು ಬಿಜೆಪಿ ಇಂಥ ಸುದ್ದಿ ಹಬ್ಬಿಸುತ್ತಿದೆ ಎನ್ನುವುದು ದೋಷಿ ಹೇಳಿಕೆ.

ಜಾಲ ತಾಣದಲ್ಲಿ ಟ್ರೋಲ್‌: ಈ ನಡುವೆ, ರಾಹುಲ್‌ ಅವರ ಟಾಯ್ಲೆಟ್‌ ಪ್ರವೇಶದ ವಿಡಿಯೊ ವೈರಲ್‌ ಆಗಿದೆ.